కోలీవుడ్‌ స్టార్‌ డైరెక్టర్‌ శంకర్‌ దర్శకత్వం వహించిన బాయ్స్‌ సినిమాతో యాక్టర్‌గా తొలిసారి సిల్వర్‌ స్క్రీన్‌పై మెరిశాడు మ్యూజిక్‌ డైరెక్టర్‌ ఎస్‌ థమన్‌. సిద్దార్థ్‌, జెనీలియా కాంబోలో వచ్చిన ఈ చిత్రంలో మ్యూజిక్‌ బ్యాండ్‌ టీంలో ఒకడిగా నటించాడు థమన్‌. అయితే ఆ తర్వాత కంపోజర్‌గా మాత్రమే సక్సెస్‌ఫుల్‌గా ప్రయాణాన్ని సాగిస్తున్నాడు. ప్రస్తుతం ఇండియన్‌ ఫిలిం ఇండస్ట్రీలో ఉన్న టాప్‌ కంపోజర్లలో ఒకడిగా నిలిచానడంలో ఎలాంటి సందేహం లేదు. ఈ స్టార్‌ కంపోజర్‌ మళ్లీ నటుడిగా మారబోతున్నాడన్న వార్త ఇప్పుడు ఇండస్ట్రీ సర్కిల్‌లో రౌండప్‌ చేస్తోంది. తాజా టాక్‌ ప్రకారం అధర్వ వన్‌ ఆఫ్‌ ది కీ రోల్‌లో నటిస్తోన్న ఓ తమిళ చిత్రంలో ఎస్‌ థమన్‌ లీడ్‌ యాక్టర్‌గా కనిపించబోతున్నాడట.
దీనికి సంబంధించి త్వరలోనే అధికారిక ప్రకటన కూడా ఉండబోతుందని కోలీవుడ్‌ సర్కిల్‌లో కథనాలు హల్‌ చల్‌ చేస్తున్నాయి. మరి ఇదే నిజమైతే థమన్‌ ఎలాంటి పాత్రలో కనిపిస్తాడనేది అంతటా ఆసక్తికరంగా మారింది. ఇటీవలే గేమ్‌ ఛేంజర్‌, డాకు మహారాజ్‌ సినిమాలకు మ్యూజిక్‌, బ్యాక్‌ గ్రౌండ్‌ స్కోర్‌ అందించాడు థమన్‌. ఈ చిత్రాలు బాక్సాఫీస్‌ వద్ద ఆశించిన స్థాయిలో టాక్‌ తెచ్చుకోలేకపోయినా మ్యూజిక్‌ పరంగా మంచి మార్కులు పడ్డాయి. ప్రస్తుతం ప్రభాస్‌తో రాజాసాబ్‌, పవన్‌ కల్యాణ్‌తో ఓజీ సినిమాలు చేస్తున్నాడు థమన్‌. అఖండ 2 కూడా లైన్‌లో ఉంది.
